Бунёди бурсияи Кембриҷ ва Донишгоҳи Осиёи Марказӣ тавофуқномаи омодасозии устодонро тамдид карданд

Date: 26 February 2020
“Донишгоҳҳои таъсиргузор бояд қудрати ҳамкориҳои стратегиро истифода кунанд”, мегӯяд муовини канслери донишгоҳи Кембриҷ профессор Туп

Бунёди байналмилалии кишварҳои ҳамсуд ва Аврупо (Бунёди бурсияи Кембриҷ) ва Донишгоҳи Осиёи Марказӣ рӯзи 26-уми феврали соли 2020 тавофуқномаи ҳамкории худро бо ҳадафи омодасозии устодон аз кишварҳои Осиёи Марказӣ барои 3 сол тамдид карданд. Ин тавофуқнома идомаи ҳамкориҳоест, ки аз соли 2017 шурӯъ шуда, барои донишҷӯёни лаёқатманди Донишгоҳи Осиёи Марказӣ ва кишварҳои дигари Осиёи Марказӣ имконият медиҳад, ки дар бахши коршиносии аршад (магистратура) ва доктории донишгоҳи Кембриҷ таҳсил кунанд. 
 

Ҳелен Пеннант, директори Бунёди Кембриҷ ва профессор Суҳайл Нақвӣ, ректори Донишгоҳи Осиёи Марказӣ ҳангоми муболилаи тавофуқномаи тамдидшуда байни Бунёди Кембриҷ ва Донишгоҳи Осиёи Марказӣ.
Маросими имзо шудани тавофуқнома дар Маркази Оғохон дар Лондон бо ҳузури Шоҳзода Заҳро Оғохон ва раису аъзои Шӯрои Парасторони Донишгоҳи Осиёи Марказӣ ва 150 меҳмони дигар баргузор шуд. Дар ин маросим муовини канслери донишгоҳи Кембриҷ профессор Стивен Ҷ. Туп дар мавриди “Ҷаҳонӣ кардани таҳсилоти олӣ ва нақши он дар рушд ” суханронӣ кард. Профессор Туп таъкид кард, ки руҳияи ҷустуҷӯи дониш, ки бунёди таҳсилоти олӣ аст, аз пушти дарҳои баста рушд намекунад ва бештарин ҷаҳиш дар илму дониш ҳангоми фаротар рафтан аз марзҳои муайяни илмӣ ва ҷуғрофиёӣ рух медиҳад. 

“Албатта, намунаи беҳтарини ҷаҳонӣ кардани таҳсилоти олӣ дар фаъолияти Шабакаи Оғохон оид ба Рушд (AKDN) ва созмонҳои омӯзишии он дар Осиёи Марказӣ, Покистон ва Африқои шарқӣ нишон дода шудааст”, гуфт профессор Туп. “Донишгоҳҳои таъсиргузор бояд қудрати ҳамкориҳои стратегиро истифода кунанд. Интихоби илҳомбахши манотиқи куҳистонӣ барои се шаҳраки Донишгоҳи Осиёи Марказӣ ва дастгирии молии саховатмандонаи донишҷӯён, ки дар сурат ғайри наметавонистанд ба таҳсилоти олӣ даст ёбанд, нишон медиҳад, ки Донишгоҳи Осиёи Марказӣ дар рушди фикрӣ ва иқтисодии ин минтақаҳо нақши муҳиме дорад. Ӯ дар идома изҳор дошт, “Ҳаргиз фаромӯш накунем, ки ҳадаф ва истеъдодҳои донишгоҳҳои мо бештар аз ҳар созмонҳои дигари ҷаҳон ба мо имкон медиҳад, ки дар эҷод, гирдоварӣ ва паҳн намудани дониш саҳмгузорӣ кунем, то ба пешрафти ҷаҳон кумак кунад ”

Пас аз ин профессор Суҳайл Нақвӣ, ректори Донишгоҳи Осиёи Марказӣ дар мавриди дастоварҳои охирини Донишгоҳ ва раванди фаъолияти он ба унвони муассисаи омӯзишии сатҳи ҷаҳонӣ дар Осиёи Марказӣ, ки  барои беҳбуди сифати зиндагии ҷомеаҳои манотиқи куҳистонӣ дар мавзӯҳои мубрам тадқиқот мегузаронад ва бо ташкилотҳои AKDN кор мекунад, суханронӣ кард. “Донишгоҳи Осиё Марказӣ худро пойпанди ироа кардани омӯзиши босифат ба донишҷӯёни давраи бакалавриат ва рушди ҳайати омӯзгорон аз кишварҳои Осиёи Марказӣ медонад”, -илова кард профессор Суҳайл Нақвӣ. “Бурсияи муштараки Донишгоҳи Осиёи Марказӣ-Кембриҷ аз тариқи тавофуқномаи нав барои табодул ва зарфиятсозии муаллимон дар минтақа заминаи беназиреро фароҳам мекунад.”

Ҳелен Пеннант, роҳбари Бунёди бурсияи Кембриҷ низ дар суханронии худ қайд кард: “Пас аз як даҳсолаи ҳамкориҳои муваффақона ман бо камоли хушнудӣ ин ҳамкориро тамдид мекунам, ки он боиси омадани донишҷӯёни лаёқатманди бештар аз Осиёи Марказӣ ба Кембриҷ мешавад”. “Бунёди Кембриҷ аз ҳамкорӣ бо Донишгоҳи Осиёи Марказӣ дар заминаи рушди устодони оянда ва ҷомеае, ки барои он хидмат мекунанд, ифтихор мекунад”, -афзуд Барбара Стокинг, иҷрокунандаи вазифаи раиси Бунёди Кембриҷ. 

Ин бурсияҳо бахше аз Барномаи омодасозии устодони Осиёи Марказӣ (CAFDP) мебошанд, ки бо ҳадафи ҷалби бештари намояндагони кишварҳои ин минтақа ба Донишгоҳи Осиёи Марказӣ амалӣ мешавад. Довталабон бояд ба талаботҳои Донишгоҳи Осиёи Марказӣ ва меъёрҳои дохилшавии донишгоҳи Кембриҷ ҷавобгӯ бошанд. Ҳамкории Донишгоҳи Осиёи Марказӣ ва Бунёди Кембриҷ ба  сифат ва собиқаи ҳар ду донишгоҳ такя мекунад, то сифати зарфияти илмии устодони ояндаи Донишгоҳи Осиёи Марказӣ баланд гардад. 



Эзоҳ:

Ҳадафи умумии Донишгоҳи Кембриҷ, Бунёди бурсияи Кембриҷ ва Донишгоҳи Осиёи Марказӣ ироа кардани омӯзиши босифат ва истифода бурдани дониш ба манфиати ҷомеа мебошад. Интизор меравад, ки олимон ва пажӯҳишгарони ҳарду донишгоҳ ва дар маҷмӯъ AKDN аз ин ҳамкориҳо барои анҷом додани тадқиқот дар арсаҳои муҳим барои Осиёи Марказӣ баҳра хоҳанд бурд. Бунёди бурсияи Кембриҷ дар ҳамкорӣ бо шарикон дар саросари ҷаҳон бештарин теъдоди бурсияҳои гуногунро барои донишҷӯёни болаёқати хориҷӣ дар Донишгоҳи Кембриҷ фароҳам мекунад. 

Донишгоҳи Осиёи Марказӣ соли 2000-ум таъсис ёфтааст. Шартномаи таъсисӣ ва Оинномаи ин донишгоҳи хусусӣ, дунявӣ ва ғайритиҷоратӣ аз ҷониби президентҳои Ҷумҳурии Тоҷикистон, Қирғизистон, Қазоқистон ва Волоҳазрат Оғохон имзо шуда, аз сӯи парлумонҳои ин кишварҳо ба тасвиб расид ва дар Созмони Милали Муттаҳид ба қайд гирифта шуд. Донишгоҳи Осиёи Марказӣ як муассисаи омӯзишии беназирест, ки ба рушди манотиқи куҳистон таваҷҷуҳ мекунад. Шаҳракҳои донишҷӯии Мактаби илмҳои гуманитарӣ ва дақиқи ин донишгоҳро меъмори ҷоизадор – Арата Исозакӣ тарҳрезӣ кардааст, ки дар Норини Қирғизистон ва Хоруғи Тоҷикистон қарор доранд. Шаҳраки донишҷӯии Текелӣ дар Қазоқистон феълан дар марҳилаи банақшагирӣ аст. Мактаби олии Рушди Донишгоҳи Осиёи Марказӣ аз се донишкадаи тадқиқотӣ иборат аст ва Мактаби маълумоти касбӣ ва давомдори ин донишгоҳро шурӯъ аз соли 2006 150 ҳазор донишомӯз хатм кардаанд.
This website uses cookies
Cookies are small text files held on your computer. They allow us to give you the best browsing experience possible and mean we can understand how you use our site.
Some cookies have already been set. You can delete and block cookies but parts of our site won't work without them.
By using our website you accept our use of cookies.
Yes, I agree No, I want to find out more